يافع الحدث / انتصار محمود مقبل
بدأتم الاضراب مع بداية العام الدراسي واتفقتوا على الاضراب العام لجميع المدارس بدون استثناءات .
وقليل قليل ودرينا وقد بعض المدارس فتحت صفوفها للدراسة للصفوف الاربعة الاساسية .
وقليل قليل ودرينا وقد استدعوا طلاب الصفوف الثانوية .
وبعض المدارس اللي تحمست والتزمت بالاضراب استدعت معلميها وبدأت الدراسة بنص الحصص .
ومدارس فتحت صفوفها منذ بداية العام الدراسي بمعلمات متعاقدات أو متطوعات .
وفي المديريات البعيدة مدارس التزمت بالاضراب ومدارس أكثر وأكثر منها مفتوحة للدراسة منذ بدء العام الدراسي وملتزمة بدوام كامل .
المدارس الخاصة في الحوطة كلها مفتوحة من أول يوم دراسي ومنتظمة بدوام كامل .
ونقابتنا كل يومين تلمخ بمنشور ( مستمرين في الاضراب ) في نفس الوقت اللي فيه بعض المدارس لازالت ملتزمة بالاضراب التام وكأنها جتهم فكة من مكة .
ولازلتوا في منشوراتكم تعلنوا بأن العام الدراسي لم يبدأ بعد . واللي بدأوا دونا شوه يصلحوا في المدارس ؟؟؟؟ والتعميم الوزاري الذي حدد مواعيد بدء العام الدراسي ومواعيد الامتحانات للفصلين الاول والثاني وموعد امتحانات الثانوية العامة كيف باتصلحوا به ؟؟؟؟
والله نفسي مرة وحدة تتفقوا على شيئ وتلتزموا به الى الأخير . لكن الوضع هكه مش حسين للطالب ولا حسين للمعلم وشكلة في الاخير بايقع كرداف والمنهج الدراسي بايخلص في شهرين والله يستر .
يانقابتنا مع احترامي لكم مش يقع مدارس تشتغل بدوام كامل ومدارس تشتغل بنص دوام ومدارس مقفلة . يعني لا قادرين تلزموا المدارس باضراب شامل ولا فتحتوها وخليتوا عيال الناس تدرس وطبقتوا المثل القائل لا عشقني وتم ولا كفاني بلاه .